Upplýsingar um ferð EBAK um Austurland 28. júní til 1. júlí 2021

Félag eldri borgara á Akureyri 

AUSTURLAND 

Hálendi, hérað, firðir. 

28. JÚNÍ – 1. JÚLÍ 2021 

Hótel Hallormsstaður er staðsett í samnefndum skógi og stendur við Lagarfljót. Hótelið býður upp á 92  glæsileg herbergi með stórkostlegu útsýni. Á Hótel Hallormsstað er frábær veitingastaður þar sem við  njótum 3ja rétta máltíða. Hótelið býður einnig upp á SPA með innfrarauðri sauna, heitum potti bæði úti  og inni. Dásamlegt hótel í skóginum.
 

Mánudagurinn 28. júní: 

Brottför frá Akureyri kl. 09. Ekið í Möðrudal þar sem við borðum hádegisverð með  útsýni á fjalladrottninguna Herðubreið. Ekið í Sænautasel og bærinn skoðaður. 

Komið í náttstað á Hallormsstað milli 17:00 og 18:00.

 

Þriðjudagurinn 29. júní: 

Eftir morgunverð á hótelinu er ekið í Mjóafjörð, það er afar fögur leið og fossarnir leika  við hvern sinn fingur, ekki síst Klifbrekkufossar sem eru vinsælt augnakonfekt. Við  borðum hádegissúpu á Sólbrekku og kynnumst Brekkuþorpi. Ekið á Eskifjörð með  stoppi í Hólmanesi, fólkvangi og friðlandi. 

Kvöldverður borðaður á Randulffssjóhúsi á Eskifirði. Gist á Hallormsstað. 

 

Miðvikudagurinn 30. júní: 

Dagsferð á Borgarfjörð Eystri. Hafnarhólmi heimsóttur, Álfaborgin og kirkjan. Á  Borgarfirði eru 3 veitingastaðir sem fólk getur valið um í hádeginu. Borgarfjörður er  rómaður fyrir náttúrufegurð og við tökum okkur tíma í að njóta. 

Kvöldverður og gisting á Hallormsstað. 

Hér er hægt að bjóða þeim sem vilja að fara í nýju böðin á Austurlandi að verða eftir á leið okkar heim  frá Borgarfirði www.vok-baths.is. Þeir hinir sömu yrðu sóttir fyrir kvöldmat.

 

  Fimmtudagurinn 1. júlí: 

Eftir morgunverð kveðjum við Hallormsstað. Við byrjum á því að heimsækja  Skriðuklaustur, fyrrum heimili skáldsins Gunnars Gunnarssonar. Þar er gaman að  koma og skoða inn í hugarheim hans. Á Skriðuklaustri er einnig uppgröftur á gömlu  klaustri frá miðöldum sem áhugavert er að kynna sér. Við Skriðuklaustur er  Snæfellstofa, upplýsingamiðstöð Vatnajökulsþjóðgarðs sem er ómissandi að  heimsækja. Við ökum sem leið liggur til Egilsstaða þar sem við tökum hádegishlé. 

Ef veður leyfir ökum við til Akureyrar um Hellisheiði Eystri og Vopnafjörð, ef ekki förum  við þjóðveg 1. Áætlaður komutími til Akureyrar um kvöldmatarleyti. 

 

VERÐ: 

89.300 á mann í tveggja manna herbergi. 
Aukagjald fyrir einbýli 16.100 kr. 
(Þeir sem ekki ferðast með ferðafélaga, þurfa að greiða fyrir eins manns herbergi.) Staðfestingargjald, 10.000, skal greiðast við bókun. 
Ferð skal vera að fullu greidd 1. júní 2021. 
Innifalið í verði: 
• 4 daga ferð með leiðsögn. 
• Gisting á Hótel Hallormsstað í þrjár nætur. 
• 3x 3ja rétta kvöldverðir (2x á Hallormsstað, 1x í Randulffssjóhúsi). • Hádegisverður í Mjóafirði. 
Ekki innifalið í verði: 
• Hádegisverðir (nema í Mjóafirði). 
• Aðgangseyrir á söfn og sýningar. 
• Aðgangseyrir í Vök-baths. 
• Aðgangseyrir í SPA á Hótel Hallormsstað. 
• Drykkir og annað tilfallandi. 
 

Lágmarksþátttöku þarf í ferðina.